19 iyun 2025-ci il tarixdə Sabit Rəhmanın Ev-Muzeyində Azərbaycan Xalq Cümhuriyyətinin ilk baş naziri,  görkəmli dövlət xadimi Fətəli Xan Xoyskinin anadan olmasının 150 illiyinə həsr edilmiş “Cümhuriyyətin qurulmasında Fətəli xan Xoyskinin rolu” adlı seminar keçirilib. Tədbir  Azərbaycan Respublikası Prezidenti cənab  İlham Əliyevin 2025-ci ilin “Konstitusiya və Suverenlik İli” elan olunması Sərəncamı çərçivəsində baş tutub. Məlumat üçün onu da qeyd edək ki,  Fətəli xan Xoyski 1875-ci ildə Şəki şəhərində anadan olmuşdur.

Muzeyin direktoru Pərvanə İskəndərova seminarı açıq elan edərək  bildirib ki, tədbirin iyunun 19-u keçirilməsi heç də təsadüfi deyil, 105 il əvvəl – iyunun 19-da, görkəmli dövlət xadimi Fətəli xan Xoyski Tiflisdə erməni qatil tərəfindən qətlə yetirilmişdir.

AMEA Şəki Regional Elmi Mərkəzinin Tarix, arxeologiya və epiqrafika şöbəsinin müdiri tarix üzrə fəlsəfə doktoru Rahim Həsənov “Fətəli xan Xoyskinin siyasi fəaliyyəti” haqqında, “Yuxarı Baş” Milli Tarix-Memarlıq Qoruğunun elmi işçisi və Azərbaycan Turizm Bələdçiləri Assosiasiyası İdarə Heyətinin üzvü  Zəminə Rəsulova "Dağılan "İstiqlal" qurulan "Zəfər"" mövzusunda, muzeyin  baş fond mühafizi və “Şəki Ensiklopediyası” jurnalının təsisçisi Aydın Məmmədov “Şəki Xan qəbiristanlığında Xoyskilərə aid qəbirlər”, muzeyin elmi işçisi Sevinc Məmmədova isə “Fətəli xan Xoyskinin həyatı” mövzusunda məruzələrlə çıxış ediblər.              

Sonda Rahim Həsənov özünün yeni çapdan çıxmış “Azərbaycan milli hərəkatının liderləri müstəqilliyə gedən yolda” kitabının bir nüsxəsini muzeyə hədiyyə edib və çıxış edənlər Təşəkkürnamələrlə təltif olunublar.