Muzey Şəki şəhər icra hakimiyyəti başçısının “Şəki şəhərində görkəmli dramaturq S.Rəhmanın ev-muzeyinin təşkil edilməsi haqqında” 16 oktyabr 1996-cı il tarixli, 1/538 №-li sərəncamına və Azərbaycan Respublikası Nazirlər Kabinetinin “Şəki şəhərində Sabit Rəhmanın ev-muzeyinin yaradılması haqqında” 7 sentyabr 2000-ci il tarixli, № 163 №-li qərarına əsasən təsis edilib.
Muzeyin rəsmi açılışı 8 iyun 2001-ci il tarixdə baş tutub.
Muzey XIX əsrdə Şəkidə inşa edilmiş daş binanın şərq hissəsində — görkəmli yazıçı, dramaturq və kinosenarist Sabit Rəhmanın (1910—1970) doğulub boya-başa çatdığı ata-baba mülkündə yerləşir, 4 otaq və 2 dəhlizdən ibarətdir.
Muzeydə Sabit Rəhmanın həyatının Şəki və Bakı dövrlərinə dair və ədəbi yaradıcılığı ilə bağlı, o cümlədən, oğlu — görkəmli bəstəkar Emin Sabitoğlunun həyat və yaradıcılığı ilə bağlı 707 eksponat qorunub saxlanılır. Beləliklə, muzeyə gələn tamaşaçı Azərbaycanın iki görkəmli ədəbiyyat, incəsənət və mədəniyyət xadiminin həyat və yaradıcılığı ilə tanış olmaq imkanı qazanır.